သူငယ်ချင်း (၃)

သူငယ်ချင်းရေ..

ပန်းပွင့်ကြွေတွေ လေထဲမှာတွေ့လား..

ဒီလိုကျတော့လဲ လောကကြီးက အလှသားပေါ့..

နင့်ရင်ထဲမယ်..

အချစ်ကြောင့်လွမ်း

အလွမ်းကြောင့်များနွမ်းနယ်နေလေရော့သလား..

ပြေးထွက်ခဲ့စမ်းပါ..

ကိုယ့်ကိုကိုယ် ပိတ်လှောင်မထားစမ်းနဲ့..

လာ.. ဒီမှာ.. ကောင်းကင်ကြီးကပြာလို့..

မိုးတွေညိုလာတော့ကောဘာအရေးလဲ..

တိမ်မဲမဲတွေကမိုးရွာချတဲ့အခါ..

နင့်အလွမ်းတွေကိုပါမိုးရေနဲ့မျှောပစ်လိုက်..

မိုးစဲရင်ရောက်လာမယ့်နေခြည်အောက်

ခုန်ပေါက်ပစ်လိုက်စမ်း..

ကြိုးစားသမျှ အရာမထင်တာတွေ..

ပြန်မရလိုက်တဲ့ နားလည်မှုတွေ..

ထပ်တူမကျနိုင်တဲ့အချစ်တွေ..

အားလုံးခဏဘေးဖယ်ထား..

လောကကြီးကတရားပါတယ်..

နေ့မှာအလင်း ညမှာအမှောင်..

အယောင်ဆောင်တွေထည့်မတွက်ကြေးဆို

ဘယ်ညကမှ နေ့လိုမလင်းနိုင်ဘူးလေ..

အမှောင်ပြီးရင် ရောက်လာမယ့်အလင်းရယ်..

မုန်တိုင်းနောက်က လေပြေညှင်းလေးရယ်..

နုနုနွေးနွေး မိုးစဲနေလေးရယ်..

မြင်ယောင်ကြည့်လိုက်စမ်း..

တို့ကမ္ဘာကြီးက သာယာပါတယ်ဟာ..

သြော်.. ကျန်သေးတယ်..

နင်လိုအပ်နေတဲ့အချိန်တိုင်း..

တုံ့ဆိုင်းမနေနဲ့နော်..

ခေါင်းလေးတချက်သာငဲ့ကြည့်လှည့်..

နင့်သူငယ်ချင်းငါ..

နင့်ဘေးမှာပါလာစေရမယ်..

ပွင့်မြူးဇင်

၁၂.၀၈.၂၀၁၁